ع اقتراب الامتحانات الحضورية يوم الاثنين ومعارضة القسم الاكبر من الطلاب لها، وفي ظل الاصرار الكبير من ادارة الجامعة على اجراء الامتحانات، بدأ الطلاب بالتصعيد على طريقة المسلسل الشهير “la casa de papel” وأصدروا البيانات التالية:
بيان رقم ١
حضرة مدير المعهد العالي للعلوم التطبيقية والاقتصادية في الجامعة اللبنانية او بتحب نقلك مدير Cnam – Liban التابع Cnam-Paris-France
عذراً على هيدا الأسلوب بس لما مجلس ادارتكم الكريمة بكل اعضائه ٧ يستغشمنا (حتى ما قول يستغبينا) نحن مضطرين نكون وقحين لهيدي الدرجة.
يمكن ما نقدر نوصل ليلي بدنا ياه. بس الوقت كفيل انه يبين كل شي.
كمرحلة اولى وقبل اي شيء بنحب نذكر انه هيدا بيان رقم ١.
ما لح ننبش بماضي الجامعة كتير وطريقة ادارتها ، بس لح نضوي على الاشياء الي صارت من بداية هيدي الازمة لهلق.
بهيدا البيان الأول لح نعرف الكل مين نحنا.
نحن مجموعه شباب وصبايا، طلاب بهيدي الجامعة ما بعرف اذا بنقول اللبنانية او الفرنسية.
نحنا صبايا وشباب عنا الفهم، الوعي ، المسؤولية، الصدق، الشجاعه، الارادة، التصميم، و التضحية والصبر وحابين نكفي مشوارنا بالتعليم على احسن ما يكون لكن مش على حساب صحة اهلنا واحبابنا.
نحن مش من جماعة يلي عما يقاتلوا حتى ينجحوا موادهم بالغش عبر online يلي انتوا كإدارة ماسكينها قصة قميص عثمان (مثل شعبي) وماشيين فيها.
نحن مش جماعة يلي بتحط عصي بالدواليب.
نحن مش جماعة التعصب والعنجهية والتبعية السياسية الزبالة تبع هيدا البلد.
نحن جماعة بتحب الأمل وبتقاتل كرمال مستقبلها واحلامها وطموحاتها، لأن عنا إيمان ويقين انه ربنا السلام على اسمه ما لح يتركنا وهوي يلي لح يسددنا وياخدلنا حقنا.
نحن جماعة عنا كتير قدرات علمية وعملية مواهب، بس للأسف انتم ما عرفته كيف تستفيدوا منها (كإدارة) او تتعاونوا معنا حتى نحل المسألة بلا ما ننشر غسيلنا قدام كل العالم . على كلٍ البيانات القادمة لح تبين انكم انتو كتير مستغشمينا ومستقلين بأشياء ممكن نعملها وأشياء تانية منعرفها عنكم انتم كمجلس إدارة بأعضائكم ٧ وفيه شي خاص مميز صار مع رئيس مجلسكم الموقر ?
يتبع…
#امتحانات_الموت
بيان رقم٢
حضرة مدير المعهد العالي للعلوم التطبيقية والاقتصادية في الجامعة اللبنانية او بتحب نقلك مدير Cnam – Liban التابع Cnam-Paris-France
نحن بنعرفك بالشخصي منيح انت وعيلتك وبنعرف حبك للطلاب، بس هلء الموضوع مسئلة عملية وإلها علاقة بإدارة ازمة وارواح ناس، يعني من الآخر الحب ما لح يطعمينا خبز،
بس يمكن لازم نعتذر على هيدا الأسلوب مرة تانية لانك مش لحالك بتحمل المسؤولية الاعضاء ٦ التانين بيتحملوا كمان المسؤولية الاكبر لانهم بموقع سلطة وقرار اعلى منك، لكن لسوء حظك انت كنت ولا زلت بالواجهة امامنا كطلاب الجامعة، “يا بي الطلاب”.
يا بي الطلاب عادة بقولوا الحسنات يذهبن السيئات، بس القصة لح تصير معنا بالعكس
السيئات يذهبن الحسنات وفهمك كفاية.
بعد كل هالمقدمات صار فينا نبلش.
لح نبلش بالشق التعليمي بالاول:
بعد جهد جهيد الجامعة بعد شهر من الانقطاع عن التعليم الحضوري بسبب كورونا بلش التعليم عن بعد وكانت خطوة مهمة جداً الى الامام في مراحل تطور التعليم الجامعي عنا، هيدا الشي سمحلنا نكتشف اشياء كتير.
اولها انه عنا اساتذة بينشهدلها بكفائتها وتأقلمها السريع وتحضيرها وتعبها على كيف ممكن توصل الدرس بأي اسلوب وبدون تردد وانه ترفع من معنوياتنا وتزيدنا اصرار على مواصلة المشوار الجامعي رغم الوضع الحالي. وكانت تعطي كتير كتير من وقتها مش شوي.
بالمقابل في اساتذة وعددهم مش صغير لح اختصرها بإنه كانت تجربتهم جدا جدا سيئة وما اقدرنا نستفيد منهم واعتمدنا على حالنا مثل بقيت الاوقات حتى وقت الحضور بالجامعة.جزء من مشكلتهم انهه قليلي الخصية و ما الهم جلد يتعبوا زيادة مش مستعدين يضحوا هيدا بيرجع بيطرح سؤال جدا مشروع هل هني عم يأدوا رسالة التربية والتعليم او مجرد مصدر مالي كويس سؤال برسم الرأي العام ؟
في احد الطلاب سأل احد الدكاترة عنا بالجامعة لانه بضل يحكي فرنسا وفرنسا ويتغنا بفرنسا وانه شو نحن بلبنان المهم سأل الطالب الدكتور ليش ما بقيت بفرنسا طالما هلقد بتحبا وتحكي انه هونيك الحياة مثالية كان جوابه واضح وجدا صريح قاله مش لح كذب عليك جيت لهون لأن فيني طلع مصاري أكثر بالتعليم شو بدك بكل يلي بقلك بلدي ورسالة وكل الخبريات ، (يعني ما شاء الله على بناء جيل يحب أو يسعى شي يوم يعيش ببلده) . وهون نحنا بنحب نقول انه هيدا نموذج بنرجع بنذكر بقصته في البينات القادمة،صحيح ما بمثل كل انواع الدكاترة بهل الجامعة بس بمثل شريحة مهمة .
(خبرية رئيس مجلس إدراة الجامعة عنا هوي رئيس الجامعة اللبنانية بس خبريته بعد لقدام )
يتبع …
